به گفته مقامات در وزارت تحصیلات عالی طالبان فعالیت‌های دانشگاه‌های دولتی تا ۱۰ روز دیگر آغاز می‌شود.
به گزارش خبرگزاری شفقناافغانستان، محمد تقی، سخنگوی وزارت تحصیلات عالی طالبان امروز (چهارشنبه، ۲۹ جدی) می‌گوید که تلاش می‌کنند تا درس‌های دانشگاه‌ها به زودترین فرصت آغاز شود.
او تأیید کرد که تا ۱۰ روز دیگر دانشگاه‌های دولتی بازگشایی می‌شوند.
محمد تقی هم‌چنان تأکید می‌کند که سیستم مختلط در نظام تحصیلی متوقف شده است.
به گفته او، درس در دانشگاه‌ها برای پسران و دختران به گونه جداگانه آغاز می‌شود. وزارت تحصیلات عالی در حالی از آغاز درس در دانشگاه‌های کشور خبر می‌دهد که در پی سقوط نظام، سیستم تحصیلی کشور با چالش جدی مواجه شد و هزاران دانشجوی دختر و پسر از رفتن به دانشگاه‌ها باز ماندند.